Budysku Bohatu wěžu wobšěrnje saněruja a znowa wobarbja
Budyšin (SN/MWj). 25 lět po poslednim saněrowanju je Budyska Bohata wěža znowa wulke twarnišćo. Přichodne šěsć tydźenjow ju dospołnje zaróštuja. Něhdźe spočatk awgusta so potom poprawne twarske dźěła započnu. Mjez druhim dóstanje wěža nowu třěšnu konstrukciju z wołoja. Tuchwilu ma třěcha wobmjetk, přez kotryž so nastajnosći włóžnota předobywa, rozłoži dźensa Jobst Jaekel z měšćanskeho twarskeho zawoda nowinarjam. Je to jenička wěža w Budyšinje, kotraž njeje z metalom abo cyhelemi zakryta. Dale wuměnja wjerch pod wjerškom a špundowanje nad wuhladnišćom, zatwarja štyri nowe wokna a wuporjedźa błyskowód. Skónčnje wěžu wobarbja. Nowa barba budźe potom trochu ćmowša, štož pomnikoškitnym předpisam lěpje wotpowěduje. Dohromady płaći ponowjenje křiweje wěže 380 000 eurow. Za to je 160 000 eurow spěchowanskich srědkow přizwolenych, zbytk zapłaća ze swójskich srědkow a ze staroměšćanskeho konta, financowaneho z darow.