Złoty kwas dožiwić směć je kóždemu mandźelstwu wulka hnada. Tónle jubilej swjećeštaj minjeny tydźeń Ludwig Zahrodnik a jeho mandźelska Rejza w Jaseńcy.
Ludwig Zahrodnik narodźi so 10. oktobra 1939 we Wotrowje a wotrosće w Chrósćicach pod skromnymi wuměnjenjemi. Nan bě we wójnje zhubjeny a mać so wo třoch synow z lubosću staraše. Po zakónčenju šulskeho časa 1953 w Chrósćicach chodźeše nadarjeny pachoł dwě lěće na Serbsku wyšu šulu w Pančicach. Po dwulětnym studiju na Serbskim wučerskim wustawje złoži w Małym Wjelkowje wuspěšnje statny eksamen. Na to nastupi w septembru 1957 swoje dźěło w redakciji serbskich wučbnicow. Njehladajo dźěłowych wužadanjow jako redakciski asistent za předmjetaj stawizny a geografiju zmištrowa runočasnje štyrilětny listostudij za předmjet serbšćina a na to 1966 dalši štyrilětny dalokostudij w předmjeće stawizny. Njeličomne serbske wučbnicy za stawizny, geografiju, ručne dźěło, domiznowědu a matematiku za delni schodźenk je spisał, přełožił a lektorizował. Za swoje njesprócniwe dźěło bu z titulom Wyši wučer počesćeny.
