Sydom lět jastwa za zaraženje

pjatk, 17. junija 2016
artikl hódnoćić
(0 )

Budyšin. Wusud w procesu wo zaraženju w Budyskej měšćanskej štwórći Strowotna studnja 27. oktobra 2015 je wuprajeny. Walter M., mandźelski morjeneje Katrin­ T., dyrbi sydom lět do jastwa. Nimo toho sudnistwo wukaza, jeho do wotwučenskeje kliniki zapokazać. Do toho pak dyrbi zasudźeny znajmjeńša połdra lěta w jastwje pokućić.

Wusud wuprajiło je sudnistwo na sedmym procesowym dnju a tuž trochu zašo hač spočatnje wočakowane. We wobkrućenju předsydowacy sudnik Theo Dahm rozłoži, zo njeje žanych pokazkow na mjenje ćežki njeskutk. Wobskorženy drje bě w afekće a w stawje hłuboko sahaceho­ mylenja wědomja jednał. Při­wšěm bě wón tola – byrnjež we wobmjezowanej měrje – „knjez swojeho rozuma“. Zo bě wón do njeskutka wopojne srědki brał, je afektej polěkowało. We wobłuku wot zakonja předwidźaneho móžneho chłostanja dweju do jědnaće lět wosta sudnistwo ze sydom lětami někak w srjedźnym polu.

wozjewjene w: Łužica
Prošu přizjewće so, chceće-li komentar podać

Serbska debata

nowostki LND