Hinak hač druhdźe kulturny program abo wohnjowoborne wubědźowanje steješe w srjedźišću Běłochołmčanskeho wjesneho swjedźenja wosebite wuchodźowanje po wsy z 13 stacijemi.
Běły Chołmc (AK/SN). Před dlěšim časom zrodźenu ideju, předstajić na swojim wjesnym swjedźenju hobbyje a talenty wobydlerjow, su minjeny kónc tydźenja w Běłym Chołmcu zwoprawdźili. Tam sy so minjenu sobotu na 13 stacijach wo tym přeswědčić móhł, kak kreatiwnje so wobydlerjo we wólnym času zaběraja. „Tak chcychmy swojich ludźi trochu wužadać, ale tež začuće zhromadnosće skrućeć“, rjekny Andreas Thomas, městopředsyda wjesneho towarstwa, kotrež je swjedźeń organizowało.