Njeswačidło (LR/SN). Runja minjenym je Njeswačanska přirodoškitna stacija z Budyskim nakładnistwom Lusatia tež lětušu swjatojansku nóc na rybarskim dworje w Małym Holešowje wuhotowała. Přistajena přirodoškitneje stacije Ina Bartsch rozkładźe zajimowanym připosłucharjam wšelakore nałožki tuteje nocy kaž tež kuzło nazběranych zelow a jich mocy. Nakładnik dr. Frank Stübner předstaji skrótka swoje nakładnistwo Lusatia. Znata hornjołužiska spisowaćelka Annelies Schulz z Hołbina čitaše zajimawe wurězki ze swojeje knihi „Dopomnjenki na dźěćatstwo“, mjez druhim derje hodźacy so přinošk na tymle wječoru „Łučna apoteka mojeje wowki“. Rjeńšeho městna k dopominanju na swoju wowku njenamakaš hač wječor w ćišinje wosrjedź Božeje stwórby. Tež ze serbskich bajow znatu připołdnicu spisowaćelka ze swojeho wida wopisowaše. W ćichej nocy wšitcy wćipnje připosłuchachu a ptački k tomu swój nócny spěw zanošowachu.