Zaklinči-li přichodny čas na wjesnym, swójbnym abo druhim swjedźenju du­dlawa z „Dobry wječor, maćerka“, Hančička wowčerjowa“, „Lubka lilija“ abo hinašej serbskej pěsnju, móže to jenož z hudźbneho nastroja Bena Nowaka z Róžanta być. 65lětny smě so nětko prěni a jenički serbski dudlowar mjenować. Na chětro njewšědne wašnje je sej wón žiwjenski són spjelnił, kotryž bě 1998 na Dnju Saksow­ we Wojerecach zrodźił. Tam zetka Róžeńčan­ dweju dudlowarjow, a wot toho wokomika jeho myslička přewodźeše, sam tajki instrument wobsedźeć.

Zwoprawdźił pak je ideju hakle pozdźišo, dokelž je sej takrjec sam wjacore wuměnjenja stajił. Jónu měješe to wulka překwapjenka być, wo kotrejž ani mandźelskej ani nikomu druhemu ničo přeradźił njeje. Na tamnym boku chcyše swój nowy hobby tež porjadnje wukonjeć. Tohodla njerozsudźi so za trjebanu, ale za nowu dudlawu, kotruž sej w Berlinje kupi. Z tamnišeho zawoda tajke do wjace hač 40 krajow předawaja. Potajnstwo wobchować wšak druhdy cyle lochko njebě, hdyž dyrbješe na přikład awto raz do porjedźernje a w kófrowym rumje bě hišće dudlawa nutřka.