Dźěžnikecy (CS/SN). 247 truckow a tak telko kaž hišće ženje je minjeny kónc tydźenja na lětuše zetkanje nakładnych awtow do Dźěžnikec přijěło. Městno, hdźež běchu něhdy nowonatwarjene syčomłóćawy wotstajeli, so runjewon pukaše.

Předewšěm swójbna atmosfera tru­ckerow z cyłeje Němskeje a Awstriskeje do Dźěžnikec wabi. Lubowarjam wulkich pomolowanych nakładnych awtow z wjele chromom a lakom je tele zetkanje kaž paradiz. Widźeć běštej samo drje­wjany domčk na kolesach a jězdźaca piwowa stwa Zhorjelskeje piwarnje. Naj­dlěši puć z něhdźe 700 kilometrami měješe­ nakładne awto z Ötztala w Tirolu.

Tež wobłukowy program móžeše so widźeć dać. Hižo pjatk wječor postara so countryjowa legenda Tom Astor wo kopaty połny swjedźenski stan. Sobotu zahorichu rejwarjo Budyskeje skupiny Exit ze swojimi poskićenjemi. Jedna z wobdźělenych spedicijow měješe ješćowu kanonu sobu a pryskaše ješć.