Pjaty tydźeń wotměwa so při Němskopazličanskim wulkohaće prózdninske dyrdomdejske lěhwo. Biskopičanska syć za dźěćace a młodźinske dźěło je tam wjacore přechody organizowała.

Němske Pazlicy (SN/mwe). „Nam je wažne, zo so dźěći a młodostni tež kreatiwnje zaběraja. Skićimy jim nimo dyrdomdejskeje zaběry kaž krosnowanja w Sakskej Šwicy abo padlowanja po Sprjewi tež móžnosće, wšelake ručne dźěła wuspytać“, zdźěli sobudźěłaćerka syće Birgit Pietrobelli našemu wječornikej. Tak su sej holcy a hólcy sami drjewjane łžicy wurězbowali, wšelake wudźěłki kowali a so tež z płatom a módroćišćom zaběraja. Nazhonići fachowcy jich přewodźeja pokazujo jim wšelake rjemjesła.