Rakecy (aha/SN). Rakečanske stawizniske towarstwo RAK ze swojej agilnej předsydku Annemarie Rentsch je minjeny pjatk na wotewrjenju wobšěrneje wustajeńcy mnohich zajimcow překwapiło. Mjez wopytowarjemi běchu tež wjacori Serbja, kotrychž městopředsydka Alenka Hagerowa tež serbsce witaše.

Wustajeńca w gmejnskej rumnosći na dróze Při kuble wotbłyšćuje z njeličomnymi eksponatami stawizny Rakec wot lěta 1870 hač do kónca Druheje swětoweje wójny. „Naš wotpohlad z trajnej wustajeńcu je, dopominać a skedźbnjeć na ludźi, kotřiž su tehdy w Rakecach bydlili, skutkowali a častodosć tež ćerpjeli“, wuswětli Annemarie Rentsch zaměr wustajeńcy.