Kulow (SN). K zazběhej Krabatoweho swjedźenja wot 12. do 14. awgusta w Kulowje wotměje so prěni dźeń, pjatk, na Starym dwórnišću lětuša regionalna konferenca Leaderoweje kónčiny Hornjołužiska hola a haty. Wona steji pod hesłom „Krabat – prěni Leaderowy akter“. Tema a časowy zwisk ze swjedźenjom njejstej připadnej. Najnowše slědźenja wo žiwjenju Jana Šadowica, wo historiskim přikładźe Krabata, pokazuja, zo bě wón ideju regionalneho wuwića hižo w 17./18. lětstotku nałožował.
Prěni raz prezentuje Krabatowy slědźer Hans-Jürgen Schröter historiske fakty a wědu, kak je Šadowic jako komander kurwjerchowskeje gardy a jako knjez Wulkoždźarowskeho wudwora w regionje z akterami dźěłał, syće natwarjał, akcije přewjedował a partnerstwa wuwiwał. „Šadowic bě aktiwny regionalny manager, kiž je do přichoda myslił a žiwjenske wobstejnosće ludźi na wsach polěpšił“, konstatuje Schröter.
