Na nowym trawniku hrali a ponowjene hrajkanišćo přepodali
Serbske Pazlicy (aha/SN). Wjacorych přičin dla je mjez wjele Serbskopazličanami na lětušim wjesnym swjedźenju kónc tydźenja přewšo dobra nalada knježiła. Na jednej stronje bě to dospołnje ponowjene sportnišćo njeposrědnje při swjedźenišću. Za dohromady 110 000 eurow běchu tam płoninu zrunali, wysoke škitne płoty připrawili, nowe moderne wobswětlenje kaž tež kompletnu připrawu za krjepjenje natwarili. To zaruča, zo budźe trawnik stajnje zeleny. Njebjelčanska sportowa jednotka staraše so wo spěchowanske srědki a dósta je stoprocentnje připrajene. W kónčnej fazy pak so wujewi, zo planowana suma njedosaha. Gmejna Njebjelčicy tuž 18 000 eurow připłaći, a někotři sponsorojo projekt tohorunja podpěrachu.
Wosebje dźěći a młode swójby so wjesela, zo je Njebjelčanska gmejna za dospołne wobnowjenje hrajkanišća 2 000 eurow wudała. A nic naposledk je k dobremu poradźenju přinošowało, zo je lětsa prěni raz młodźina połnu zamołwitosć za planowanje a wotběh třidnjowskeho swjedźenja přewzała.
