Dypkownje w 16.30 hodź. su zawčerawšim w Smječkecach ze sirenu alarm wuwołali. A krótko po tym smaleštej z tamnišeje gratownje wohnjowobornej awće z módrej swěcu a ze sirenomaj.
Smječkecy (aha/SN). Přičina alarma bě předstajene zwučowanje składnostnje dźesaćlětneho wobstaća młodźinskeje wohnjoweje wobory Worklečanskeje gmejny, kotrež bě pola Wojerowskeje zasadźenskeje centrale přizjewjene. Dorostowa wohnjowa wobora, jej přisłuša dwanaće čłonow w starobje dźesać do 17 lět – mjez nimi je pjeć holcow – , třitydźensce pod nawodom hłowneho hašenskeho mištra Handrija Kruše zwučuje.
