Tež druhe přesadźowanje Worklečanskeho hosćenca bjez wuslědka

Budyšin (SN/MWj). Marlies Hüllowa je dale wobsedźerka Worklečanskeho hosćenca „Ke kupowemu hatej“. Po prěnim nanuzowanym přesadźowanju spočatk junija tež wčerawši druhi termin na Budyskim zarjadniskim sudnistwje žadyn wuslědk přinjesł njeje.

Suma a wuměnjenje, pod kotrymž móhł něchtó hosćenc kupić, běštej samsnej kaž spočatk junija. Objekt ma cyłkownu wobchadnu hódnotu 162 000 eurow.­ Znajmjeńša połojcu toho měł ­zajimc poskićić. Ludowa banka pak na kóncu rozsudźi, hač poskitk přiwozmje. Wona dźě je Worklečanskej korčmarce kredit 316 000 eurow dała.