Wojerecy (AK/SN). Móhłrjec dwójne wjeselo knježeše minjenu sobotu na 38. zwěrjencowym swjedźenju we Wojerowskim zwěrjencu. Po třilětnej přestawce su tam tajki swjedźeń znowa organizowali. Nimo toho přijimaštej zwěrjenc a susodny měšćanski muzej zhromadnje wosebite wuznamjenjenje. Za zhromadnosć wobeju zarjadnišćow, za jeju kreatiwnu kooperaciju a za wutworjenje zhromadneje syće počesćištej jej inicia­tiwa „Němska – kraj idejow“ a Němska banka we wobłuku 11. cyłozwjazkoweho wubědźowanja „Wuznamjenjene městna w kraju idejow“.