Za nowy dom wodosportoweho towarstwa Při Módrym dźiwje Drježdźany při Třižonjanskim jězoru su tele dny zběhanku swjećili. Kanuća maja wulke plany a chcedźa tam po móžnosći dołho­ wostać.

Běły Chołmc (MF/SN). „Tajkile wulki dom widźeć nas zwjesela“, praji Hans Effenberg z předsydstwa wodosportoweho towarstwa. Hač k dnjej, jako su na Běłochołmčanskim pobrjohu Třižonjanskeho jězora zběhanku swjećili, běchu jenož plany a rysowanki widźeli. Planowali su dom, kotryž ma towarstwu jako narunanje za zhubjeny domicil při Hórnikečanskim jězoru słužić, wězo w dorěčenju z nowym wužiwarjom. Na nimale 550 kwadratnych metrow wulkim delnim poschodźe nastawaja nimo hale za čołmy treningowa rumnosć, jědźernja, kuchnja a sanitarny wobłuk, na hornim poschodźe na 230 kwadratnych metrach pjeć hóstnych stwow a běrow.