Lisćina dróhotwarskich naprawow w Budyskim wokrjesu bywa dźeń a dlěša. Tež w přichodnych tydźenjach budu we wšěch kónčinach puće twarić. Šoferojo dyrbja so na to nastajić.

Pančicy-Kukow (SN/mwe). „Ludźo dyrbja komuny zrozumić, hdyž so wosebje nětko w poměrnje samsnym času na wšelakich blakach dróhi twarja. Wšako sej to woby­dlerjo tež žadaja. Na druhej stronje pak so woni hněwaja, hdyž dyrbja někotre dny abo wjacore tydźenje a měsacy wobchadne a dalše poćežowanja znjesć“, Měrko Domaška, nawoda zarjadniskeho zwjazka „Při Klóšterskej wodźe“ w Pančicach-Kukowje praji. Wěsty konflikt widźi wón w tym, zo so wokrjesam a gmejnam ze stron stata hłownje w druhej połojcy lěta spěchowanske srědki za dróhotwarske a dalše naprawy a z tym zwisowace předewzaća přizwola. Pjenjezy pak dyrbja so k wotpowědnemu terminej „wotdźěłać“, hewak kónc lěta spadnu.