Městnosć dopomina na Hanku Šěrcec

Hórki (SN/MWj). Tak kaž su wčera na mnohich městnach w kraju róčnicu pogromoweje nocy lěta 1938 wopominali, zhromadźi so tež w Hórkach něhdźe 25 Serbowkow a Serbow, a to při lěta 2014 połoženym kopolaku za Hanku Šěrcec. Rodźena Židowka bě w Hórkach w katolskej swójbje wotrostła, doniž ju nacionalsocialisća njezawlečechu. Dopomnjeće na nju žiwe zdźeržeć bě zaměr zarjadowanja, na kotrež běštej Jěwa-Marija Elic a Hórčanske wjesne towarstwo Při skale přeprosyłoj.

„Prašeš-li so dźensa ludźi, što bě 9. nowembra 1938, mnozy z ramjenjomaj sukaja, dokelž njeznaja wuznam woneho dnja“, praji Jěwa-Marija Elic w swojej krótkej narěči. Kopolak při Hórčanskim hłownym puću do směra na Chrósćicy je jeničke městno, hdźež Hanku Šěrcec zjawnje wopominamy. „Tohodla je wažne, zo tele a wšitke tajke městna škitamy. Za to je ciwilna kuraža trěbna, kaž měješe ju młoda Židowka“, rjekny Hórčanka.