Zo sej młode swójby nowy swójski dom twarja, móžeš dźensa na mnohich městnach wobkedźbować. Zwjetša činja to na podobne wašnje, mjenujcy z nowymi twaršćiznami. Zo to tež hinak dźe, dopokazuje Jan Fryča w Nowej Wjesce.
Nowa Wjeska (SN/MWj). W žanym zakonju njesteji, zo dyrbiš sej dom z nowymi cyhelemi twarić. Po tutej zasadźe nastawa w Nowej Wjesce pódla tamnišeho swjedźenišća nowy dom Jana Fryče a jeho swójby. Twar, za kotryž su njedawno zběhanku swjećili, so ryzy po formje mnohim dalšim tajkim domam runa. Nadrobnosće pak swědča wo tym, zo so wón wot druhich chětro rozeznawa. „Ideju, stare, ale njetrjebane cyhele a kamjenje wužiwać, bě naš nan zrodźił. Z architektom smy dorěčeli, hač je to scyła móžno. Ale wón je přihłosował, a tak sym před połdra lětom twarić započał“, powěda 38lětny. Jeničke wuměnjenje bě, zo maja cyhele dźensa žadane izolaciske hódnoty dodźeržeć. A to wone činja.
