Budyšin (Łu/SN). „Sym překwapjeny wot pomocy wobydlerjow města, z kotrejž azyl pytacych čestnohamtsce podpěruja, njehladajo na čas a pjenjezy.“ Tole rjekny Tasuka Kido, młody žurnalist a fotograf japanskeje agentury z Tokija, kiž bě šěsć dnjow w Budyšinje přebywał, při roz­žohnowanju. Prěni króć bě wón z tołmačerjom do Europy přišoł, zo by so zeznajomił z problemami azyl pytacych a ludnosće, wo kotrychž mjeztym tež japanske medije rozprawjeja. Tak wopytaštaj wonaj wospjet syrisku swójbu Alkhabaz. Znate je, zo ju Jan Nuk hižo dlěši čas podpěruje, kaž činja to tež druhe serbske swójby abo jednotliwcy. Tež wo tym staj so młodaj mužej z Japanskeje dokładnje wobhoniłoj.

Pjatk wječor koncertowaše Drježdźanska skupina Banda Internacionale na Budyskich Žitnych wikach za solidaritu. Program hudźbnikow ze šěsć krajow bě japanskimaj hosćomaj rjane dožiwjenje. Widźeštaj pak tež, zo stejachu njedaloko prawicarjo, wot policije wobstražowani.