Kónc januara ma naćisk směrodajneho koncepta Wojerecy 2030 předležeć

Wojerecy (AK/SN). Nastupajo přetwar města móhło město Wojerecy po wšej Němskej komuna z modelowym charakterom być. Tole podšmórny architektka Dorit Baumeister na wčerawšej měšćanskej dźěłarničce we Łužiskej hali, hdźež zaběrachu so ze směrodajnym konceptom Wojerecy 2030. „W našim měsće ličba wobydlerjow najbóle woteběra. Smy w ekstremnym połoženju. Zaměr ma tuž być, tónle trend najpozdźišo za dźesać lět zadźeržeć. Ludźo dyrbja zaso sem přića­hnyć“, rjekny architektka něhdźe 60 wobydlerjam.