Wojerecy (AK/SN). Anton a Antonia so zaso znjesetej. „Spočatnje stej na so šłoj, zranjenjow pak njebě“, powědaše hladarka zwěrjatow Anne Siegl wčera w tropowym domje Wojerowskeho zwěrjenca wo nosorohačowymaj leguanomaj. „Wot spočatka januara stej wonej zaso hromadźe.“

Wobě zwěrjeći běštej poslednja stacija třitydźenskeje inwentury w zwěrjencu. K wobstatkej słuša 96 družin z 1 106 zwěrjatami,­ kotrež maja so zapisać, ličić a wažić. „Při inwenturje zdobom planujemy, kotre zwěrjata móhli dołhodobnje wotedać a kotre nic. Nimo toho při tym strowotny staw zwěrjatow zwěsćamy“, rozłoži zwěrjencowy direktor Eugéne Bruins. Tuchwilu drje maja mjenje zwěrjatow hač loni, dokelž běchu 300 rybow wotedali, za to pak maja dźewjeć družin zwěrjatow wjace, mjez druhim insekty, hady, ješćelcy a bažanty. Najwjace zwěrjatow maja pola skopčkow.