Kontrowersnje diskutowali su Bukečanscy gmejnscy radźićeljo na swojim wčerawšim posedźenju wo namjeće třoch młodych ludźi, we wsy nowu wólnočasnu městnosć wutworić.
Bukecy (CS/SN). Po woli skupiny młodostnych měł w Bukecach tak mjenowany pumptrack nastać. To je kolesowanski parcours z hórkami a křiwicami, po kotrymž móžeš tež na přikład z rolerom jězdźić. Po prěnich diskusijach běchu městno při stanowanišću faworizowali a so płoniny při šuli wzdali. Nětko pak předleži nowy namjet. Wjesnjanosta Norbert Wolf (CDU) přilubi ze sportowym towarstwom rozjimać, hač njemóhła wólnočasna městnosć při sportnišću nastać, hdźež móhł zamołwity za trawnik sobu za prawym hladać.
