Worklečanska gmejna rosće a tak tež wužadanja za gmejnsku radu
Worklecy (JK/SN). Zo ma gmejna Worklecy starosće z městnami w horće, je hižo dlěje znate, tež zo je susodnu Njebjelčansku gmejnu prosyła, problem sobu rozrisać. Do Worklečanskeho horta chodźi po informacijach wjesnjanosty Franca Bruska (CDU) tuchwilu 85 dźěći. Za 80 maja oficialnu dowolnosć. Za wjace hortowych dźěći maja tučasnje wurjadne přizwolenja. Zo bychu dźěći w horće zmysłapołnje zastarać móhli, trjebaja dołhodobnje 95 městnow.
Za přichodny 1. lětnik je za Worklečansku zakładnu šulu 39 dźěći přizjewjenych, 24 maćernorěčnych serbskich a 15 z rěčnje měšanych swójbow. Wone budu wot spočatka noweho šulskeho lěta w třoch skupinach wuwučowane. Za to přistaja na zakładnej šuli mjez druhim tři nowe wučerki. Štó budźe dotalnu nawodnicu šule Luciju Kuškec naslědować, wjesnjanosta Brusk na minjenym posedźenju gmejnskeje rady hišće zdźělić nochcyše.
