Stotki wěriwych na swjatkownym putnikowanju do Róžanta
Róžant (SN/MWj). Při přijomnym wjedrje su so wčera stotki serbskich wěriwych na kóždolětne putnikowanje do Róžanta podali. W dźesać procesionach nóžkowachu pak wot domjaceje wosadneje cyrwje abo z Róžantej bliskich wsow k hnadownemu městnu. Prěni raz zasadźichu nowu zwukowu připrawu, kotruž bě klóšter Marijina hwězda na putniskej łuce připrawić dała. Božu mšu wuhotowała je Budyska wosada. Hłowny celebrant bě tachantski farar Wito Sćapan, kiž kemše hromadźe z dalšimi duchownymi swjećeše. Wo hudźbne wobrubjenje postarachu so chór 1. serbskeje kulturneje brigady pod nawodom Friedemanna Böhmy a Ralbičanscy pozawnisća pod nawodom Achima Dučmana.
