W rjedźe wjesnych swjedźenjow w gmejnje Ralbicy-Róžant je tón w Konjecach-Šunowje stajnje prěni w běhu lěta. Minjeny kónc tydźenja je wón zaso tójšto wobydlerjow přiwabił.

Konjecy/Šunow (aha/SN). Wotměnjawy program za wšitke starobne skupiny na wjesnym swjedźenju w Konjecach-Šunowje stej wuhotowałoj Konječanske blidotenisowe towarstwo z předsydu Křesćanom Gruhnom a Konječansko-Šunowska wohnjowa wobora ze Silwijom Čórlichom na čole. Sobotu wubědźowachu so tři volleyballowe mustwa, z kotrychž wopokaza so Konječansko-Šunowski młodźinski klub jako najwuspěšniši. Mjeztym pjate lěto přewjedźechu swój swjedźeń na dworje Konječanskeho towarstwoweho domu Delany. Tam knježeše sobotu wječor při zabawnej hudźbje dobra nalada, ke kotrejž přinošowachu tohorunja młodostni z derje předstajenym skečom.