Z walčkami słomy chcedźa na folklornym festiwalu puć zaraćić
Chrósćicy/Kamjenc (SN/mwe). Tež za lětuši XII. mjezynarodny folklorny festiwal w Chrósćicach maja wosebity wot lěta 2015 płaćiwy wěstotny koncept. Wěstota ma tež na tymle zarjadowanju prioritu. „Mamy firmu, kotraž je za wěstotu we wsy zamołwita. Na wšěch statokach budu ludźo, kotřiž so tam wo porjad staraja“, wuzběhnje Katharina Jurkowa z přihotowanskeho komiteja festiwala. Přidatnje pak chcedźa lětsa prěni króć přijězdy do wsy z wulkimi walčkami słomy zaraćić. Kaž Jurkowa dale zdźěla, ze stron policije na organizatorow festiwala žane přidatne žadanja wěstoty dla njejsu. Najebać to maja zarjadowarjo přez cyły čas na festiwalu intensiwne kontakty z policiju, zo móhli zastojnicy w trěbnym padźe hnydom zapřimnyć. Wěste wužadanje wšak lětsa budźe, zo je w Pančicach-Kukowje twara mosta dla hłowna dróha do Kamjenca zawrjena a zo wobjězdka tež přez Chrósćicy wjedźe. „Prócujemy so wo to, zo nam dowola, wjes sobotu a njedźelu dospołnje zašlahać“, so Katharina Jurkowa nadźija.
