Nowy móst nad Klóšterskej wodu a wutwar statneje dróhi S 100 w Pančicach-Kukowje je tuchwilu z wotstawkom najwjetše nadróžne twarnišćo w dwurěčnych gmejnach. Z tejle seriju chcemy twarnišćo přewodźeć a starosće tamnišich wobydlerjow wobswětlić.

Mjeztym połdra měsaca je statna dróha S 100 w Pančicach-Kukowje zawrjena. Ludźo su so na to zwučili, zo dyrbja zdźěla dosć dołhe wokołopuće na so brać. Tak tež pjekar Maik Zelnak, kiž pak ma hišće cyle hinaše starosće. Wón ma při swojej pjekarni napřećo klóštrej předawarnju a dalšu w kupnicy Netto a je takrjec dwójce wot twarnišća potrjecheny. „Dokelž bě hižo do toho wotwidźeć, zo ludźo w delnim wobchodźe nakupować móc njebudu, smy tule wot srjedź meje časy redukowali a začinjamy hižo w dźesaćich. To je někak čas, hdyž smy w pjekarni dodźěłali. Po tym zwožu wšitke twory do hornjeje předawarnje w Netto“, pjekar rozłožuje. Deleka žanu předawarku hižo nima, ale zwjetša sam twory předawa.