Narć (FAG/SN). 165 wohnjowych wobornikow, mjez nimi 112 holcow a hólcow młodźinskich woborow z cyłeje Sakskeje w starobje 15 do 18 lět, wukmanja so tuchwilu w Narćanskej krajnej wohnjowobornej a katastrofoškitnej šuli. Wobdźělnicy maja so w tesće wědy, w sportowym wobłuku kaž tež we wobornotechniskim wobłuku wopokazać. Zo bychu sej wukonowu sponku zdobyli, wopruja woni swoje prózdniny a mnozy dalši a wukubłarjo swój dowol.
„Wohnjowoborny tydźeń w Narću njeje jenož wočerstwjenje. Wukubłanje je cyłozwjazkowa wosebitosć“, wobkruća našemu wječornikej 59lětny Andreas Huhn, kiž wukubłanski tydźeń fachowje přewodźa. Wón angažuje so hižo 50 lět w dobrowólnej wohnjowej woborje w Drježdźanach. Hižo wjacore kubłanske tydźenje je Huhn tule w Narćanskej wohnjowobornej šuli přewodźał a wučbu podawał. Stajnje ma tež wotewrjene wucho, hdyž dźe mjez młodostnymi wo naležnosće wohnjoweje wobory.
