Dwanaty króć wotmě so sobotu nóc tysac swěčkow w klóšterskej zahrodźe klóštra Marijineje hwězdy. Byrnjež so popołdnju mócnje dešćowało, je wječor při najrjeńšim wjedrje wjace hač tysac wopytowarjow přijěło. Mjez nimi běchu tež mnozy dowolnicy.

Pančicy-Kukow (mbr/SN). Na jewišću klóšterskeje zahrody w zežiwjenskim a zelowym centrumje Křesćansko-socialneho kubłanskeho skutka (CSB) dožiwichu wopytowarjo pisany a wotměnjawy program. Wo serbske štučki kaž tež němske, jendźelske a instrumentalne přinoški postara so skupina Sorbian Art Trio, kotraž publikum prěni raz na zarjadowanju zahori. Helene a Fritz Vogel z Wojerec pokazaštaj na klawěrje a pozawnje swój hudźbny talent.