Lětoń (CS/SN). Wopytowarjo Budyskich lětanskich dnjow, kotrež so wot dźensnišeho na Budyskim lětanišću w Lětonju wotměja, drje ju wuhladać njebudu. A tola změje Blanka Wićazowa na wšěch dnjach ruce połne dźěła. Jako nawodnica na toweru lětanišća ma so wona wo to starać, zo móža lětadła porjadnje startować a přizemić. Hdyž ma wona na normalnych dnjach něhdźe sto tak mjenowanych lětanskich pohibow koordinować, je jich na kóždym z třoch dnjow lětanišćoweho swjedźenja něhdźe 1 500 startow a přizemjenjow. Přetož mnozy wopytowarjo wužija składnosć za kołolět. Nimo toho pokazaja wuměłstwowi lětarjo swoje kmanosće a wopytowarjo móža sej tež historiske mašiny na zemi a w powětře wobhladać.