Wupožčowarnja kostimow Křesćana Bulanka wobsteji 30 lět

Wojerecy (SN/MWj). Lubowarjo pjateho počasa su nětko zaso wosrjedź norskeho časa a něchtóžkuli so praša, w kotrym kostimje drje tónraz póńdźe. Štó móhł potom w dwurěčnych łužiskich kónčinach lěpje pomhać hač Křesćan Bulank we Wojerecach. Ze swojej wupožčowarnju kostimow w starym měsće swjeći wón nětko 30lětny jubilej.

„Nochcu to scyła prawje wěrić. Je hižo telko lět zašło, zo sym tule z dobrymi sto kostimami započał“, 72lětny tróšku zdychnje, jako jeho zawčerawšim wopytachmy. Strowota jemu mjeztym kusk klubu čini, nutřkownje pak so rodźeny Wotrowčan za póstnicy hori kaž prěni dźeń. Z nimi takrjec natyknyła bě jeho mandźelska Monika kónc 60tych lět. Pozdźišo je Křesćan Bulank w Kulowje samo pjeć razow póstnisku narěč dźeržał. W běhu lět zrodźi wón mysličku, wutworić kostimowu wupožčowarnju, za čož přewostaji jemu město Wojerecy dodźeržany dom w starym měsće. Prěni čas ludźo w dołhich rynkach čakachu, zo móhli sej pola njeho kostim wupožčić. Hač na něhdźe 1 500 kostimow je Bulankec fundus rozrostł.