Radworčan na wikach žiwu husycu dobył

póndźela, 17. decembera 2018
artikl hódnoćić
(0 )
Maćij Žur (nalěwo) je sobotu na Radworskich hodownych wikach žiwu husycu dobył . Přepodał bě jemu słódnu pječenku Marko Wawrik.  Foto: Bosćij Handrik Maćij Žur (nalěwo) je sobotu na Radworskich hodownych wikach žiwu husycu dobył . Přepodał bě jemu słódnu pječenku Marko Wawrik. Foto: Bosćij Handrik

Radwor (SN/mwe). Třeći króć wotměchu w Radworju sobotu nawječor před hosćencom „Meja“ małe dohodowne wiki. Wot wjesnjanow derje přiwzate a tež mjez wobydlerjemi z wokoliny woblubowane zarjadowanje organizuje mějićelka cateringoweho předewzaća a wotnajerka „Meje“ Katleń Wawrikowa.

Jako wosebitosć su hosćom na sobotnych wikach zaso wšelake chłóšćenki poskićeli. Nimo bozankoweje poliwki a sadu ze šokolodu wobdatym abo wosebitych twarohowych kulkow běchu to pražene kołbaski po „Wawrikec“ recepće. Rěznik z Budyšina bě kołbaski „tykał“. Zboka małeho swjedźenišća, hdźež běchu tež tepjenske hriby nastajili, poka­zowachu filmy, tak nimo krótkeho dźě­ćaceho filma pask „Radworski powě­trowy portret“ abo klasikar „Die Feuerzangenbowle“. „Sym z dohodownymi wikami spokojom, wjedro je wudźeržało, Ra­dworčenjo su spontanje přichadźeli a su při wšelakich družinach horceho wina rjenje a lóštnje bjesadowali“, Katleń Wawrikowa rozprawja. Tež lětsa móžeše hósć wikow w loteriji žiwu husycu dobyć. Tónkróć bě to Radworčan Maćij Žur.

wozjewjene w: Lokalka
Prošu přizjewće so, chceće-li komentar podać

nawěšk

nowostki LND