Wjele dobrych idejow zrodźili a wěru zjawnje wuznawali
Pančicy-Kukow (SN/MWj/JaW). Zo změja jutry 2020 historiski charakter, bě z toho časa wěste, jako bu znate, zo křižerjo tónraz jěchać móc njebudu. Mnozy drje wobchowachu sej škričku nadźije, zo so hišće něšto změni, spjelniła pak so wona njeje. Ćim bóle bě wobdźiwajomne, na kak wšelakore wašnje su křižerjo hromadźe z wobydlerjemi přiwšěm jutrowne poselstwo Zrowastanjeneho zjawnje wozjewjeli. Njemóžachu drje je na konju do susodneje wosady njesć, zjawnje zaklinčało jutrowne haleluja přiwšěm na mnohich městnach je.
Tak so na přikład we Wěteńcy wobydlerjo hižo sobotu wječor po w Serbskim rozhłosu wusyłanych kemšach z Chrósćic na nawsy zhromadźichu a pod kantorstwom Hawštyna Smoły jutrowne kěrluše zaspěwachu. W samsnym času zestupachu so tež wjacore swójby w Róžeńće před swojimi ležownosćemi a zhromadnje kěrluše spěwachu. Mnozy mějachu při tym jutrownu swěčku w ruce a dalši pisachu jutrowne poselstwo z krydu na dróhi.
