Budyšin (CS/SN). Nowa ideja, kotraž měje­še swoje wuchadźišćo 2011 w Francoskej, so wot lěta 2014 tež w Němskej dźeń a bóle rozšěrja. To, štož so němsce „Marktschwärmerei“ mjenuje, so po Wojerecach a Zhorjelcu nětko tež w Budy­šinje etablěruje. Producenća žiwidłow z regiona zetkawaja so na centralnym městnje wjetšeho města a přepodawaja tam kupcam žiwidła, kotrež běchu ći do to­ho online skazali a zapłaćili. Za to dojednachu so w Budyšinje na stajny termin­ štwórtk wot 17 do 19 hodź. Tele wiki trochu hinašeho razu přewjeduja w bywšim wobchodźe za kolesa při parkowanišću „Króny“.