Wuspěšna ekskursija po lěsu w najrjeńšim nalětnim słónčku njedaloko Grodka měješe chutny pozadk. Łužiske lěsy ćerpja pod wulkimi škodami, kotrež je mjeztym wjacore lěta trajaca suchota zawiniła.
Grodk (JoS/SN). Lěsne zawodowe zhromadźenstwo „Wuchodne koło Grodk“ (FBG) je minjeny kónc tydźenja na swoju tradicionalnu kóždolětnu ekskursiju přeprosyło. Zajim wobsedźerjow lěsa za temu „Je hižo pjeć do dwanaćich za naše lěsy?“ běše přemóžacy. Předsyda FBG Ulf Lutzens witaše jich na wulkej lěsnej swětlinje. Městnosć pod milinowodom běchu wot wobrosta wurjedźili, zo bychu wšitcy zajimcy pódla być móhli, najebać postajenja za škit před koronu.
