Wjesne srjedźišćo w Němcach ma so ­žiwe, zelene a originelne stać. We Wo­jerowskim wjesnym dźělu bydli 673 ­ludźi, za kotrychž chcedźa centrum wsy zachować.

Němcy (AK/SN). Wjesny předstejićer Němcow Eugeniusz Diesterheft rjekny wčera na rozmołwje z nowinarjemi: „Nazymu dóstachmy informacije wo wěstych spěchowanskich srědkach.“ Prěnjotnje planowali běchu wjesne srje­dźišćo w lěće 2018. Nětko chce město Wojerecy zhromadnje z wjesnym dźělom projekt konsekwentnje zwoprawdźić. Cyłkowne kóšty wučinjeja 300 000 eurow. Město nadźija so 80 procentow spěchowanja z programa Leader w regionje łužiska jězorina. Wone chce wotpowědnu próstwu stajić a planuje swójske srědki z měšćanskeho etata.