Zjawna diskusija wo wužiwanju Ludoweho domu w měsće trěbna
Běła Woda (CK/SN). Kak dale z Ludowym domom abo lěpje prajene z tym, štož je woheń zawostajił? Z tymle prašenjom zaběraše so minjenu wutoru Běłowodźanska měšćanska rada na wurjadnym posedźenju. 25. apryla bě wulkowoheń pod pomnikoškitom stejacy objekt w stilu Bauhausa chětro wobškodźił. Nimo zadwělowanosće jewjachu so hišće samsny wječor hłosy, žadace sej nowonatwar. Ludowy dom je wažny dźěl měšćanskich stawiznow, tež dokelž běchu tam wobydlerjo młodźinsku swjećbu swjećili, prěnju lubosć zetkali abo so na póstnicach zabawjeli. Ludowy dom bu 1928 jako dźěłarniski dom natwarjeny, a to z darami wobydlerjow we wobjimje 180 000 hriwnow. Za NDRski čas wotměwachu so w nim na přikład tež ptačokwasne zarjadowanja. Na Dnju Saksow 2005 zaměstnichu tam „Serbsku wjes“.