Po lońšej přestawce swjatki póndźelu zaso kemše na putniskej łuce

Róžant (SN/MWj). Při nic tak horcym wjedrje kaž zašłe lěta su so wčera stotki wěriwych ze wšitkich serbskich katolskich wosadow na putniske kemše do Róžanta podali. Hinak hač zwučene drje žane procesiony do Róžanta kročili njejsu. Njeličomni kemšerjo pak dojědźechu sej z kolesom k hnadownemu městnu abo wotstajichu awta we wokolnych lěsach a posledni čwak puća nóžkowachu. Zdźěla dźěchu tež mjeńše horstki ludźi zhromadnje a so při tym róžowc modlachu, kaž skupina Wotrowčanow.

Na putniskej łuce samej mějachu přitomni hygieniske postajenja wobkedźbować, mjez druhim nahubnik wužiwać a wotstawki dodźeržeć. Wonkowny wobraz bě tajki, zo bě snano hišće wjace kemšerjow hač minjene lěta. Najskerje pak zaležeše to na tym, zo so woni žadaneho wotstawka dla na łuce bóle rozdźělichu.