Slepo (AK/SN). Hort w loni wotewrjenym Němsko-serbskim šulskim centrumje Slepo chce dołhodobnje tež přirodowu a lěsnu pedagogiku do swojeho koncepta zapřijeć. Za to wjedu rozmołwy z přirodoškitnym zwjazkom a ze statnym zawodom Sakski lěs. „Chcemy rady lěsnu skupinu w horće wutworić. To ma pilotowy projekt ze statnym zawodom być“, podšmórny nawodnica šulskeho horta Christin Becker na wčerawšim posedźenju Slepjanskich gmejnskich radźićelow. Za swój zaměr chcedźa najprjedy raz šulski teren wužiwać. Pozdźišo móhli sej předstajić, bliski lěs sobu zapřijeć. Dwě kubłarce so tuchwilu zaměrnje dale kubłatej, zo byštej sej certifikat za lěsnu pedagogiku zdobyłoj. Swój projekt chce hort ze skupinu 30 šulerjow zahajić. Za nich twarski wóz wotpowědnje wuhotuja. Šulerjo a kubłarki móža jón potom po potrjebje za wuknjenske wobsahi wužiwać.