W Kamjencu změja měšćanski swjedźeń a zabawny park
Kamjenc (SN/MWj). Tradicionalna Kamjenska Boršć, kaž ju z časa do korony znajemy, njejsu hižo loni wotměć móhli. Tež lětsa dyrbi wona wupadnyć. Přiwšěm chcedźa Kamjenčanam a Kamjenčankam kaž tež wopytowarjam z wokoliny kónc awgusta zabawu skićić. Za to přewjedu tam wot 20. do 22. awgusta měšćanski swjedźeń, a wot 20. do 29. awgusta zarjaduja na terenje Boršće zabawny park.
We wobłuku měšćanskeho swjedźenja chcedźa na wjacorych městnach hudźbu najwšelakorišeho razu zaklinčeć dać, a to na torhošću před radnicu, na Šulskim naměsće, při Mjasowych jětkach, před słodarnju a na Pastwinej horje před tamnišej wěžu. Tam organizuja sobotu, 21. awgusta, wot 21.30 hodź. wulki wohnjostroj, kiž budźe zawěsće daloko widźeć. Zajimawostku změja wšitke tři dny na torhošću. Tam natwarja wulku LED-fotosćěnu, na kotrejž pokazaja potom impresije ze zašłych Kamjenskich Boršćow. Za to móža zajimcy hač do njedźele swójske wobrazy online zapodać.
