Staroměšćanski festiwal z wulkej wotměnu ludźi wabił

Budyšin (CS/SN). Na kóncu tola tak zlě njebě kaž připowědźene. Nimo pjatka dešćik organizatoram Budyskeho staroměšćanskeho festiwala klubu činił njeje. Za nadróžny swjedźeń so wjedro samo jako idealne wopokaza, dokelž njebě ­přećopło a tež nic přezyma. Tohodla knježeše na wšitkich zarjadowanskich městnach dobra nalada. Hłownje běchu to dwór před Serbskim muzejom, ruina mnišeje cyrkwje, naměsto před Michałskej cyrkwju a bara Sundowner. Wšudźe so z ludźimi mjerwješe. Špatnych wjedrowych prognozow dla běchu so krótkodobnje rozsudźili, 13. klankodźiwadłowy swjedźeń z ležownosće pod Starej wodarnju do Kamjentneho domu přepołožić. Tón drje je wot stareho města trochu zdaleny, přiwšěm njejsu tam přemało wopytowarjow dla skoržić trjebali.