Wšitke frakcije měli w dźěłowym kruhu za serbske naležnosće sobu dźěłać
Budyšin (SN/at). „Rozprawa pokazuje, zo su so wustawki z wotpowědnym žiwjenjom pjelnili.“ To rjekny Budyski krajny rada Michael Harig (CDU) předwčerawšim nimale na kóncu zjawneho dźěła posedźenja wokrjesneho sejmika w zawodnych myslach k pisomnje předležacym wuwjedźenjam, kak je wokrjes Budyšin Wustawki wo zachowanju, spěchowanju a wuwiću serbskeje rěče a kultury w lěće 2020 zwoprawdźił. Korony dla njehodźachu so tež mnohe serbske zarjadowanja wotměć, Michael Harig wuzběhny. Wón skedźbni na dwaj wobłukaj, kotrejž stej prěni raz do tohole rozprawnistwa přiwzatej. Stej to Kamjenski Muzej zapadneje Łužicy a planowanje šulskeje syće. Wokrjesna społnomócnjena za serbske naležnosće Halena Jancyna je pomhała podłožk zestajeć. Wona, tak krajny rada připowědźi, budźe wokrjesnemu sejmikej lětsa w štwórtym abo klětu w prěnim kwartalu sama rozprawjeć.
