Zejicy (aha/SN). Hdyž zeznaštaj so před sydom lětami předsyda Towarstwa Cyrila a Metoda Jurij Špitank a prelat dr. Dariusz Kruczyński, direktor diecezanskeho zwjazka Carity w pólskim měsće Ełku, drje woběmaj wědome njebě, zo je to spočatk kruteje zhromadnosće. Tehdy přeprosy Kruczyński Serbow ze słowami: „Přijědźće k nam na Mazury.“

Po tym zo je so w lěće 2017 něhdźe 50 ludźi z busom do 750 kilometrow zdaleneho města ze swojimi nimale 60 000 wobydlerjemi podało a sej tamniše poměry zbližiło, spózna TCM trěbnosć, tamniši maćerny dom do akcije „Łužica pomha“ zapřijeć. W domje, kotryž bě direktor tamnišeje Carity, prelat Kruczyński, lěta 2008 natwarić dał, so rjadniske sotry 18 měsacow wo młode maćerje staraja. Wone dyrbja hakle to najtrěbniše kaž płokać a warić nawuknyć, zo móhli so wo swoje dźěćo starać. Za młode ­maćerje je TCM nazymu 2017 prěni raz drastu, črije, hygieniske artikle kaž tež płokanski próšk, kuchinske graty a dalše wěcy wšědneje potrjeby zběrało. Wot ­toho časa bu akcija kóžde lěto přewjedźena. Loni pak dyrbješe wona pandemije dla wupadnyć.