Wirtuelna nutrnosć „Zhromadnje – ćicha nóc“ ze serbskim podźělom

Budyšin/Lipsk (hle/SN/CoR/at/JaW/bš). Druhe lěto za sobu smy hody w korona-pandemiji dožiwili. W mnohich serbskich a dwurěčnych katolskich kaž ewangelskich wosadach su wěriwi lětsa po lońšej nanuzowanej přestawce korony dla zaso nimale po starodawnym wašnju swjećić móhli. Wurjadny po­dawk bě patoržicu dwurěčna ekumeniska wirtuelna nutrnosć z Lipska pod hesłom „Zhromadnje – ćicha nóc“ wobeju wulkeju cyrkwjow w Sakskej.

K hodam staj so krajnej radaj hornjołužiskeju wokrjesow ludnosć tradicionelnje postrowiłoj. „Koronapandemija nam dale wuwědomja, kak zranliwi smy. Na­jebać naš postup a našu wědu na mnohe prašenja žane wotmołwy hišće nimamy ... Wšitcy pak měli w tak ćežkej situaciji stajnje respekta połni ze sobu wobchadźeć“, piše Zhorjelski krajny rada Bernd Lange (CDU).