Slepjanska wosada starosći so mylenja pokoja pochowanych dla

Miłoraz (AK/SN). Else Zech móže so hišće derje na lěto 1966 dopominać. Prěnje domy wjesneho dźěla Nowoměšćanski wutwar, přisłušaceho Miłorazej, so tehdy zhubichu. W samsnym lěće přepołožichu pohrjebnišćo na wuchodnu kromu wsy. Po słowach chronista Manfreda Nowaka bě Zjednoćenstwo ludowych bru­nicowych zawodow (VVB) projekt noweho pohrjebnišća w Miłorazu wobkrućił. „Miłoraz, wokrjes Běła Woda, wobwod Cho­ćebuz leži na twarskej přestrjeni Wo­chožanskeje brunicoweje jamy. K wjesce słuša kěrchow z 250 rowami, kotryž je tohoru­nja na předwidźanej přestrjeni jamy.“­ Jón do Mułkec přepołožić pak bywša gmejna Miłoraz wotpokaza, dokelž njebě tam městna dosć. Město toho bu Miłoraske pohrjebnišćo spočatk 60tych lět zawrjene a hnydom nowe na wu­chodźe wjeski zarjadowane. „Stary kěrchow započachu potom 1966 přeměstnjeć a su to tež bórze dokónčili. Nima­le w samsnym času bu wjesny dźěl Nowoměšćanski wutwar přesydleny“, chronist Manfred Nowak w swjedźenskim spisu z lěta 2003 rozprawja.