Dokelž dóstanje dobrowólna wohnjowa wobora w Chrósće pola Wulkeje Dubrawy jězdźidło za katastrofowy škit, trjebaja tam za swoju gratownju přidatnu halu, kotruž dyrbja přitwarić. Wo tym su dołho diskutowali.

Chróst (UM/SN). Gratownju dobrowólneje wohnjoweje wobory w Chrósće we Wulkodubrawskej gmejnje dyrbja powjetšić. „Trjebamy přidatnu halu, zo móhli jězdźidło katastrofoweho škita Budyskeho wokrjesa do njeje stajić“, rozłoži wjesnjanosta Lutz Mörbe (njestronjan). Tale naležnosć je hižo časćišo na dnjowym porjedźe posedźenjow gmejnskeje rady stała. Hłowny dypk disku­sije při tym bě, hač dyrbja nowu ­halu přitwarić, abo hač njeby lěpje było wobstejacu halu abo znajmjeńša dźěl pohłubšić, zo by so nowe jězdźidło po wysokosći do njeje hodźało.