Wojerecy (AK/SN). Tež za lěto 2022 zdźěłuje město Wojerecy tak mjenowany wobydlerski etat. Za njón su wobydlerjo dohromady 137 namjetow zapodali. Z nich je 68 za město same a 69 za wjesne dźěle. Dźěłowa skupina je so tele dny z idejemi za město zaběrała. „Wobydlerjow takrjec dwójce zapřijimamy, jónu při namjetach a jónu při wothłosowanju“, rozłoži sobudźěłaćerka města Korina Janßen.

Jedyn z namjetow je, wodźenski system města z nowymi tafličkami wuhotować. Tuchwilne běchu składnostnje Dnja Saksow 1998 připrawili. Dalša ideja předwidźi, park skulpturow w bydlenskim kompleksu 7 znowa wuhotować a tam překasancam tyjace rostliny sadźeć. Přepruwować tohorunja móhli, hač je dosć tak mjenowanych psyčich nuznikow w měsće. Nimo toho wobydlerjo namjetowachu, w Parku narodow wjetšu kastaniju sadźić a tak wobstatk štomow wudospołnić kaž tež fasadu sportownje Foucaultoweho gymnazija z nowymi grafitijemi wuhotować. Tajki projekt hodźał so po měnjenju dźěłoweje skupiny tohorunja z wobydlerskeho etata zwoprawdźić.