Wodźiznam přirodne rěčnišćo zmóžnić gmejnu wulce wužaduje
Njebjelčicy (JK/SN). Runja tamnym gmejnam zarjadniskeho zwjazka Při Klóšterskej wodźe ma nětko tež Njebjelčanska koncept, hladać a wobhospodarjeć wodźizny 2. rjadu. Na njedawnym posedźenju gmejnskeje rady je Radebeulski krajinowy planowar dr. Andreas Stowasser radźićelam a přitomnym wobydlerjam koncept rozłožił. Po sakskich zakonjach dyrbja potrjechene wodźizny hač do lěta 2027 přirodźe podobny staw měć. To rěka, zo maja je tak wobhospodarić, zo wotpowěduja dołhodobnje přirodnym wuměnjenjam, w kotrychž wodźizny ćeku.
