Kamjenc (BG/SN). W putniskej hospodźe při wuhladnej wěži na Kamjenskej Pastwinej horje su minjeny pjatk ponowjene sanitarne rumnosće přepodali. Zo móžachu tónle projekt zwoprawdźić, je hłownje zasłužba Kerstin Boden. Wona bě sama hižo po Jakubowym puću hač do Santiaga de Compostela putnikowała a wě, zo so při tym chětro poćiš. Tohodla su porjadne sanitarne wuměnjenja w putniskej hospodźe jara wažne. A runje to putnicy w Kamjencu w zašłosći časćišo porokowachu. Tohodla bě sej wona předewzała, to změnić.

Dokelž trjebachu za projekt něhdźe 15 000 eurow, zrodźi Kerstin Boden ideju, na njewšědne wašnje dary zběrać. Wona připowědźi, z dołhimi plećenymi šlebjerdami wuhladnu wěžu na Pastwinej horje zakryć, a namołwješe přećelow, znatych a zajimcow při tym pomhać. To měješe tajki wulkotny wothłós, zo sta so ideja ­loni z nadregionalnym podawkom. Ze wšěch kónčin Němskeje kaž tež z wukraja dochadźachu 20 króć 20 centimetrow wulke plećene lapki, kotrež su w Kamjencu do dołhich šlebjerdow zešili.