Jutry we Łužicy nimale po zwučenym wašnju swjećili – 1 389 křižerjow w dźewjeć procesionach
Budyšin (CS/SN/bn/JaW). Telko hosći sprjewine město ze znatych přičin k jutram dołho wjac dožiwiło njebě. Jutry kaž molowane dožiwichu hosćo po cyłej Hornjej Łužicy. Předewšěm běchu jutrowničku ludźo po tysacach do Budyšina přišli, zo bychu sej křižerski procesion wobhladali. Po tym podachu so na Hrodźiško (Protschenberg) na jejkakulenje. Tam běchu jutrowne wiki spřihotowane a poskićichu jewišćowy program, kotryž je chór Serbskeho ludoweho ansambla sobu wuhotował. Wjeršk bě jejkakulenje za dźěći zhromadnje z Jejkacym Handrijom.
